為期一個月的世界盃，今日凌晨正式圓滿結束！在賽事舉行期間，不少商場和酒吧也舉行與世界盃相關的活動，更邀來人氣o靚模及紅星出席，是極佳的「吸金良機」。
隨着戰果塵埃落定，亦為o靚模埋單統計收入時，結果周秀娜以大熱姿態勝出，她一共出席了16個騷，加上內地啤酒足球宣傳及網上宣傳活動等，Chrissie成功吸走160萬元，成為o靚模中的「World吸女王」，下周則轉戰書展，又可賺個盆滿缽滿！而Chrissie和葉念琛昨日為《10分試愛》「孤男寡女」約會飯局錄影，問到有否遇過變態追求者？她說：「冇，追求都唔啱心水，都只因為唔合眼緣。」有指她計劃結婚，她說：「喺外國拍寫真時着過婚紗，當時係有諗過，但返嚟錄呢個節目，覺得有好多問題（指情侶相處），所以打消咗念頭，暫時冇呢個計劃。（生BB？）以前諗30歲前結婚生B，但依家有變，會以事業為重。」
怕走光着兩條打底褲
而緊隨Chrissie的吸金女是出道僅年多的「警鐘模」Jessica C.（JC），曾任啤酒世界盃代言人的她，加上出席商場活動，百萬元酬勞袋袋平安。JC昨日出席黃埔新天地舉行的世盃前哨派對，吸取上次走光教訓，自爆穿了兩條打底褲，舉手投足也顯得小心，不時用手按實裙邊：「我今（昨）日一定放低對腳，仲着咗兩條褲，之前因為踢波，所以走光，做咗一個唔小心嘅錯誤。」
DaDa收入勁升一倍
至於最近人氣急升的「百果園咪神」陳靜（DaDa），曝光率爆燈，DaDa在世界盃進行期間，出席了12場活動，再加上為運動品牌宣傳，合共掘走30萬元酬勞，以新人計成績相當不俗。
DaDa昨日出席活動時承認世界盃為她帶來不少收入：「多咗好多商場騷，希望四年後都見到我，收入係多過以前。（多幾多倍？）多一倍。」她表示冬天如要性感，則看工作需要，最緊要是工作不好冬眠。
另外，李克勤、台模王心恬和林佳陵、新八模、「天氣小姐」黃婉曼和由11位o靚模組成的Jelly Girls等，亦於世界盃舉行期間密密賺，認真和味。克勤於電台開咪講波，據悉酬勞是150萬元；Jelly Girls則密食當三番，她們共出席了55場酒吧騷，賺了約百萬元酬勞，爆出小冷門！而黃婉曼則透露賺了六位數字：「呢段時間簽咗畀apm，做咗十幾廿場世界盃賽事，有六位數字酬勞，相比原本人工多四、五倍，不過呢個月好辛苦，我會將筆錢儲起佢，然後同父母旅行。」