人氣潮模Angelababy昨晚出席上海半島酒店舉行的《Peach John搶灘上海》內衣騷，出席嘉賓包括品牌老闆娘兼「濱崎步契媽」野口美佳、Baby師妹Sarah、徐淑敏和老公黃浩，而日本女星吉川日奈、日模道端Angelica和天后濱崎步，則送上花籃道賀。Baby身穿黑色連身裙亮相，與野口談笑風生，野口還大讚Baby靚女。在15分鐘的發問環節上，傳媒只集中向野口發問，令Baby變成「布景女」。
默默承受壓力
Baby入行至今，屢受整容傳言困擾，近日又有報道指她整容，更用新舊照作對比，Baby聞言相當激氣，她受訪時按捺不住發火說：「無聊！佢哋要積口德啦！一次又一次咁講，又話我隆鼻、削腮骨、嘴唇抽脂，講到我成塊面都係假，成個假人咁，嗰時我箍牙面腫，影相角度又唔靚，佢哋又唔攞再細個啲相做比較。」
為了驗明正身，Baby透露會找醫生照X光驗證：「我有行動過，但Check過香港冇醫院有咁嘅服務，上網知道范冰冰驗證過，我想倣效佢。（男友介意？）唔係，之前承受壓力好辛苦，我撐到依家，朋友都知我冇做過（指整容），佢哋都摸過。（驗埋身材？）唔會，因為好Private（私人）。（為報道喊？）曾經試過，依家就冇。」至於何時去驗？她說：「今年尾或者明年初，公司已經聯絡緊。」
拒評妄攝模
Baby雖為傳聞動怒，但提到男友黃曉明時即流露甜笑。問到男友有否安慰？她發嬌嗔說：「冇，唔好再講佢。」現場有六位模特兒身穿性感噴血內衣行騷，Baby表示怕醜：「我冇膽着內衣畀人睇，好多人話我性感，但我係保守女仔，唔可以同性感掛鈎。（因為有男友？）唔係，遲啲要拍電影，要Keep形象。」談到挑選內衣是否需迎合男友口味？她說：「唔會，我只忠於自己，我鍾意可愛內衣。（透視款式？）冇人睇啦！又驚走光。」
近日「妄攝o靚模」曾麗儀拍了「撕」暴片段，上載YouTube遭圍插，Baby說：「喺日本冇聽過（妄攝）。（贊唔贊成？）每個人嘅方法唔同，可能佢付出要承受壓力好大，我冇權去評論，但會叫師妹唔好咁做，將來條路會好行啲。」
由小到大百變Look
Angelababy堅稱冇整容，其實是否整過，事實勝於雄辯，睇相一目了然！
童年
眼仔睩睩的Baby，童年時面圓圓，樣子十分可愛，有如公仔倒模。
未入行
Baby被翻未入行前的舊照，箍牙厚唇Look確實非常「趕客」！
入行後
16歲入行的Baby曾為本報影專訪，雙眼皮位置明顯較淺，而嘴唇較厚。
去年
Baby去年在遊艇拍攝泳裝月曆，大騷身材，今年突然「升Cup」惹隆胸疑雲。