苟芸慧參選華裔小姐後加入娛樂圈，亦因為佢個樣甜美，又可以Show吓身材，所以愈嚟愈多嘢做，不過苟姑娘成日畀人話「大隻」，搞到佢要積極減磅，嗰日小小So見到佢，讚佢瘦咗好多，佢即刻邊拎住大裝蒸餾水係咁飲，邊講佢嘅瘦身大計，口口聲聲話唔會畀壓力自己，但其實佢已經畀咗好大壓力自己。
小小So：你飲咁多水，唔怕水腫嘅咩？
苟芸慧：我初時都以為飲水多會水腫，不過我睇過中醫，食中藥會令我皮膚起粒粒，原來飲水係可以幫助排毒，仲可以令自己冇咁腫！
小小So：咁你係咪要戒口戒得好犀利？
苟芸慧：都係o架！不過我都有定時做機減肥，個營養師同我講話我啲脂肪其實唔多，只係較為水腫，不過我天生骨架大，減極都好似好大隻。
小小So：慢慢嚟啦！唔好畀咁大壓力自己。
苟芸慧：係呀！我唔會畀咁大壓力自己，最近拍劇公司要我染髮，其實我咁大個女都未染過髮，唔知會點呢？