十五位應屆港姐候選佳麗，昨日完成印度外景拍攝返港，全部戴上太陽眼鏡遮倦容，(10)馬鈞怡及(8)彭慧中的「攬仔相」被公開，馬鈞怡否認性格開放，又自言性格男仔頭，她承認攬仔照中，其中一個是前男友，她說：「同個男仔拍拖兩年，不過分咗手四年幾，其他嘅就係朋友，其實錫面都冇乜所謂，不過我唔想畀人誤會，以後會檢點啲。」
昨日又有讀者爆料指憑着驕人身材而人氣急升的彭慧中家境非常不俗，中四時已被父母安排到英國讀書。不過，她在當地卻爛蒲爛玩，差不多每晚也會去派對狂歡，食煙、飲酒及醉攬外籍男伴亦是常見之事！彭慧中則表示在英國讀書，習慣與人擁抱：「攬仔嘅定義係咩？我搭爹哋膊頭算唔算，出嚟玩對男、女朋友都係咁，係正常社交生活。（有冇影過情慾照？）冇，之前拍過拖，只係正常拍拖生活。」至於(5)莊思明、(13)陳庭欣的家人亦有前來接機。
