陳倩揚被馬德鐘鬧到失魂

港姐出身的陳倩揚（Skye），大讚今屆候選佳麗質素不俗：「佢哋有唔同性格，質素都幾好！」對於不少佳麗未參選已被是非纏身，她說：「梗會有呢啲新聞，叫佢哋唔使太介意！（曝光率高會着數啲？）咁我又唔覺得！見報多或者會造成負面影響，最緊要享受參選過程，今年佢哋去咗印度拍外景，係一個好難得嘅經驗！」

另外，Skye最近忙於拍古裝劇，與馬德鐘不乏對手戲的她，大讚對方好人及有耐性：「有一場戲講我畀佢狂鬧，我要做一個驚青嘅反應，點知我畀佢鬧嗰吓真係嚇驚咗，唔記得對白，全場爆笑！」

18/06/2010