英皇歌手林峯昨日為下月舉行、由英皇主辦的兩場《瑞士依波路表浪漫呈獻Come 2 Me Beauty Live On Stage》演唱會舉行記者會，獲無綫高層樂易玲及何麗全撐場，盡顯愛將地位！今次演唱會將以火為主題，他坦言未驚過，亦未有因此買重保險：「我哋會以音樂行先，唔會好危險，總之到時會好Hot啦！（戰衣激過上次？）服裝仲未試，但會有好多唔同場面，好神秘！」

無綫兩大高層樂易玲與何麗全出席記者會撐林峯。

林峯預告個唱玩火，會上特別找兩名索女助「慶」。

林峯指個唱上將大玩男士性感誘惑：「啲歌本身都好Sexy，到時會有好多後生仔想喺香港聽到嘅嘢！我都想試吓唔同嘢，好似我都唔知點解成日都要唱悲傷歌。（唔玩悲情玩激情？）都有，總之就煽情啦！」他表示已邀得容祖兒擔任嘉賓，笑言對方要求「好Hot嘅嘢」！

否認新劇抄襲

另外，網友繼續狂轟《談情說案》抄日劇《Boss》及《MR. BRAIN》等，但林峯指《談》劇拍得比《MR. BRAIN》更早，沒可能抄襲：「我中學睇偵探小說嘅情節都係差不多，我唔會困擾，個劇受歡迎就得！」