貪靚、姿整嘅藝人小小So喺圈中屢見不鮮，當然不修邊幅嘅亦一樣有，早排小小So同何超儀講開佢老友謝霆鋒為咗打機，可以不眠不休幾日唔沖涼洗頭都係閒事，超儀竟然自爆老公陳子聰先係娛樂圈中「犀利哥」，唔係讚佢型，係話佢Dirty！
超 儀：一個霆鋒，一個我老公都係同一種人！
小小So：你老公又唔似唔沖涼洗頭嘅人喎！
超 儀：你有冇留意我老公，佢成日都戴住頂漁夫帽，佢咪因為冇洗頭囉！佢啲頭髮係「立」到起一條條「髮坑」，嗰頂漁夫帽同佢個頭一樣都係唔洗，仲發出陣陣「酸餿味」。
小小So：咁你真係愛屋及「污」咯！
不過超儀同小小So講，有時都會頂唔順，惟有趁老公瞓咗，用濕毛巾幫佢抹吓塊面同手腳，冇法啦！鬼叫佢係自己老公咩！