栢芝與Lucas向來都是導演及廣告商的寵兒，經常被巨額酬勞利誘，不過栢芝千揀萬揀，最終揀了入行時的伯樂星爺，為他獻出母子檔！星爺的動畫電影《長江7號愛地球》昨日在上海舉行記者會，栢芝抱着Lucas撐場，吸引中港兩地二百多名記者逼爆現場，相當墟冚！

放大圖片	栢芝向大家打招呼期間，Lucas當玩「人肉搖搖板」一樣，認真識搶鏡！

「不要說我媽媽肥」

向來精靈的Lucas，在台上盡顯活潑本色，一時攬實媽咪、一時圍着梳化氹氹轉，又當梳化是小遊樂場，爬來爬去！除了瞇眼及翹手外，他更跟傳媒玩「躲貓貓」，匿在栢芝身後，搶去星爺風頭！不過，星爺仍送上「7仔」公仔，但Lucas誤當咪高峰說話，之後發現是「流嘢」，即拿真咪大講英語及大叫，打斷星爺及徐嬌的對話，但因咬字未清而被星爺取笑講外星話，引起哄堂大笑！Lucas走來走去期間，曾一度跌倒，星爺即站起來查看，栢芝則笑說：「男子漢大丈夫沒問題！」Lucas則拒絕星爺攙扶，自己站起來繼續玩。記者會中段，栢芝着Lucas跟大家打招呼，又教他講英文，其中一句「不要說我媽媽肥」，引起哄堂大笑！

講「外星話」 Lucas當梳化是遊樂場，搞到星爺都冇符，十分搞笑！	玩躲貓貓	藏身櫈底

栢芝極少帶Lucas出席公開活動，更遑論一起工作，但為了星爺，她除與囝囝亮相記者會外，更以母子檔合唱《長江7號愛地球》主題曲，相當畀面！栢芝不諱言全因感激對方當年給她機會：「12年前我第一套戲，係星爺帶我出嚟，冇佢冇我，所以要感恩！我好多第一次都畀晒佢，只希望佢送多啲玩具畀Lucas！」問到若《長》片大收，會否分花紅給Lucas？星爺說：「秘密！」栢芝則說：「錢一定要畀！象徵式畀1蚊！接咗呢個工作，好大壓力，每日6點半起身，同Lucas開聲、聽熟旋律同教佢記國語歌詞！」

星爺與栢芝難得同場出現，難免密密斟。	轉眼間徐嬌已亭亭玉立，晒腿示人。	Lucas不慎跌倒，栢芝即抱起他加以安撫。

席間，星爺問栢芝會否再拍戲？她笑說：「你管我啦！」又笑指星爺孤寒，找他請食飯很難，星爺即尷尬地說：「尋日咪請過你食囉！」問到霆鋒是否贊成Lucas唱主題曲？栢芝則自稱小女人，不能代老公答問題，至於會否讓Lucas加入娛樂圈？她則表示囝囝要專心讀書，其他事則順其自然，星爺則表示Lucas今次只是玩票性質，勸傳媒不要看得太嚴重，栢芝即笑說：「他是我老公嗎？」星爺聽後只好傻笑打圓場。另外，栢芝產後復出，陳芷菁、趙學而及葉佩雯等均在微博撐她狀態大勇。