無線今年只可直播四場世界盃主要賽事，期間不能播放精華片段，故炮製「另類」節目《世界盃動起來》，播出新一代咪神高海寧於南非「冒險」直擊世盃賽事的片段，並找來多位藝人實行大堆頭撐場，以對抗死敵有線。

惟節目播映以來，劣評如潮，前晚更將藝員緋聞擺上枱，兼加插「獎門人」式的遊戲，完全離題！當晚節目探討「球員應否在世界盃期間禁慾」的話題，鍾志光鬧着玩問曾有球員男友的妹李綺雯：「問你就最清楚！」她尷尬反擊：「就算球員唔帶老婆同女友去，都未必禁到（慾）嘅！」而劉俐報道足球賽果時報到「甩甩咳咳」，被評欠專業，日前她亦在微博留言自認太緊張，事後難過得想哭。

阮兆祥撐有新鮮感

此外，節目要求嘉賓玩「獎門人」式遊戲，阮兆祥與錢嘉樂用口當「龍門」接零食，令本應是體育節目變成無聊戲碼，加上無線因與四大唱片公司鬧翻，欠缺以往的「穩膽」李克勤及譚詠麟等紅星助陣，連自己台的一線花旦小生亦欠奉，又沒有足夠的專業講波佬壓場，重溫賽事亦只能以動畫「模擬入球片段」代替，吃力不討好，網民感可笑之餘，亦紛紛要求節目「摺埋」！

事後本報記者致電阮兆祥，他說：「我同錢嘉樂只係嘉賓身份，間中現身。（被插無聊？）個節目係喺兩場波之間，緩和緊張情緒。TVB都製作咗好多唔同節目，派人去南非、『天氣小姐』黃婉曼以天氣報告形式講波，雖然阻止唔到比較，但如果做番一模一樣，專業形式嘅講波節目，到時觀眾又會投訴冇選擇！」而李綺雯對於被玩一事說：「排嗰陣以為講笑，點知正式都有，冇法啦！因為女嘉賓唔熟足球，所以要以花邊新聞帶動氣氛。」

阿倫現身有線睇波

鍾志光對於只能在節目中「齋吹」亦感無奈：「只可以講無可奈何！好多客觀環境因素，節目啱啱開始，要睇反應，花邊新聞帶起節目趣味性。（反應好差？）明嘅！惟有盡量做。（吃力不討好？）唔辛苦，只係冇得現場講波，覺得好唏噓，上屆仲有阿叔（林尚義）同伍晃榮兩位前輩，但佢哋先後離開咗。」

另一方面，有線既奪得世盃播映權，亦坐享無線與四大決裂後的「漁人之利」，前晚便邀得譚詠麟亮相節目欣賞阿根廷對尼日利亞的賽事。