模界女神Angelababy早前去咗北京工作，小小So咁啱又去北京睇騷，仲同Baby住埋同一間酒店，朝早仲一齊食早餐添！嗰朝Baby冇化妝，不過點睇都係靚女一名，着T恤短褲一樣吸引，佢見到我即刻主動打招呼，又坐喺我隔籬，Nice到爆！我哋傾傾吓竟然見到紅姑鍾楚紅喺酒店外面散步，前一晚先同紅姑喺騷上同Party度見過面嘅Baby又再一次大讚紅姑靚，仲話睇愛情小說喊到開水喉咁，果然感情豐富！
Baby ：紅姑真係好靚！我尋晚同佢影完相之後，就覺得自己好樣衰喇！
小小So ：你咁靚女，點會樣衰？
Baby ：紅姑真係好有女人味！好有魅力！
小小So ：你哋唔同年紀有唔同嘅靚啫！你依家係少女味，到你再大個啲就會好似紅姑咁有女人味㗎喇！
Baby ：希望啦！
小小So ：你尋晚喺Party玩到幾點？
Baby ：我去打個招呼，逗留咗一陣就走，返咗酒店，不過我睇小說睇到四點幾先瞓，我睇到喊晒，好感人！
小小So ：個故事講咩？
Baby ：係發生喺文革時期嘅愛情故事，真人真事，我開頭喊時只係用手抹眼淚，之後愈睇愈喊得犀利，啲眼淚都抹唔住，最後喊到個枕頭濕晒！