入行至今，Juno曾與不少女星包括鍾欣桐（阿嬌）及日本AV女優蒼井空等傳出緋聞，惟未能開花結果，但他前晚出席UNDERCOVER派對時，竟高調自爆戀情，突然承認與因拍MV而傳緋聞的混血女模Janine拍拖，並透露女友亦是派對嘉賓，只是前後腳到場。Janine避過記者耳目入場，但在場內所見，公開確認女友身份的Juno，心情勁靚又風騷，與Janine入場後即恍如糖黐豆，原本穿着恤衫的他，盡興至凌晨二時許，又「慶」起脫掉恤衫，僅穿黑色背心的他，露出結實的「麒麟臂」，更懶理旁人目光，全程與女友在派對內煙韌。

以手開路夠風度

公布「玲龍戀」如放下心頭大石的Juno，與Janine談情時毫不避忌，除了不時輕摟女友纖腰外，又多次勾肩搭背。當二人欲「闢室」談心時，Juno先細心地用手為女友開路，而Janine與女友人「雞啄唔斷」時，亦不忘輕撫Juno肩膊，以免冷落男友，愛得貼心又黐纏！與此同時，記者發現派對場內有一名疑似保鏢的男子對Juno亦步亦趨，但並沒有妨礙Juno談情。

Juno與Janine深情對望，實行「你眼中有我，我眼中有你」。	風度十足的Juno，用手為女友開路，真係Man到暈。	Juno與Janine如連體嬰般貼到實，真係冤氣到「接受唔到囉！」

情陷兩女疑劈腿

據知，Juno去年暑假與Janine因拍攝《寫得太多》MV而傳出緋聞，有指他當時狂發短訊攻陷Janine芳心，又以靚車接載伊人；同年11月，Janine上載與前男友的合照暗示舊情未逝。及至12月，Juno再邀Janine拍攝MV，其後二人被指拖手出席I.T派對，但同一時期卻傳出Juno暗撻阿嬌，據知「龍嬌戀」今年二月方告終，Juno因而被指疑似「劈腿」！此外，對於公開戀情及被拍得煙韌蒲Ｐ，Janine透過模特兒公司表示不作回應。