愛美係女人天性，小小So好多化妝師朋友都話近年流行自然妝容，好多名牌時裝嘅模特兒都特別唔修眉毛，甚至故意畫粗一啲，仲話將眉毛修得幼幼係非常過時，所以好多女星索性任由眉毛生長，化妝時Gel得整整齊齊就OK！對於天生眉毛發達嘅台星「翻版桂綸鎂」柯佳嬿嚟講應該係個好消息，因為佢天生眉毛生長速度快，以前為咗追貼潮流先狠心將眉毛修到好幼，每次拔眉毛都會痛到眼淚直標，而且好花時間。
依家潮流終於興粗眉大眼，佳嬿本應好開心，可惜佢啲眉毛長得太多，而且仲好似冇方向嘅亂草咁！佢同小小So講，早前來港宣傳電影《艋舺》期間，化妝師都特別騰出一位助手，全程拎住專業眉刷跟住佢！活潑嘅佳嬿講嘢時鍾意擠眉弄眼，表情多多，長長嘅眉毛好容易唔受控制，好似頭髮一樣會亂，所以助手就帶住眉刷跟住佢，每次埋位影相唔係補粉同印面油，而係首先掃整齊眉毛，非常搞笑！