投資觸覺敏銳的楊超成看準高爾夫球場的發展潛力，年多前與朋友合資在將軍澳開設面積逾50萬平方呎的高爾夫球練習場，他直言投資金額難以計算：「呢度原本係一塊爛地，我哋要好似起樓一樣，除雜草、建地基、水電全部要重新搭建，用咗年半時間先完成。」他直言這是一項回報較慢的投資項目，但憑着一股熱誠甘願一拚：「真係為興趣，以前做東華主席期間，識咗幾位志趣相投嘅總理，大家都鍾意打Golf，所以決定一齊搞。」

楊超成銳意將高球運動普及化，發掘更多有潛質的高球手。

花了年半時間，楊超成與朋友合資的高球練習場終於落成。

破「有錢人玩意」觀念

一般人認為打Golf是「有錢人」的玩意，但楊超成希望可以將Golf運動普及化，並推廣至年輕一族：「以前同幾位總理私底下贊助過一位女學生出國打Golf，覺得佢好有潛質，唔想埋沒天才，依家佢已經成為香港數一數二嘅Golf球手。為咗培育新一代，我哋嘅Golf Club有較多優惠畀教學團體，等學生可以多啲參與唔同類型運動，希望將來有香港人喺國際大賽上得獎。」他認為港府對運動推廣有不足的地方，他說：「香港政府好奇怪，一向較少投放資源推廣運動項目，除非喺大賽事攞獎，好似以前李麗珊滑浪攞奧運金牌，或者舊年東亞運動會足球賽事攞獎，成為咗全城熱話，政府先會推廣。」

放大圖片

放大圖片

打Golf最易傾成生意

楊超成熱衷推廣Golf運動，原來他亦是打Golf發燒友，每個月都會落場作戰，他笑說：「好多人鍾意邊飲酒邊傾生意，但酒醉之後可能唔記得，打Golf就唔同，環境好、空氣好，頭腦都清醒啲，最易傾成生意。加上打Golf係一項講求技巧嘅運動，唔需要六呎高或者好大隻都可以打得好好，適合任何年齡人士參與。」