最近憑一部《歲月神偷》而人氣急升的蔡穎恩（Evelyn）和邦民女陳嘉寶（Anjaylia），憑着可愛甜美的少女味，再度冧莊成為時裝品牌2%旗下「ODF」春夏季的中、港、台及馬來西亞地區代言人，還延續Angelababy和Janice Man的經典孖妹形象。

青春無敵的Evelyn及陳嘉寶，捱冷穿背心及短裙擺甫士。

陳嘉寶自爆東京之旅令她增重五磅。

買到失控大出血

今次冧莊再任代言人，酬勞加碼，她們早前遠赴日本東京取景，實行寓工作於娛樂。當地天氣寒冷，氣溫僅得攝氏五度，演繹春夏季服飾的她們要捱冷穿上背心及短裙影相，但她們不畏寒風，輕鬆擺甫士，連設計師亦對她們讚不絕口。

完成拍攝工作後，孖妹趁機在東京充電「梳乎」一番，Evelyn更自爆在當地大出血：「我向來好慳，好少失控咁買嘢，但今次酬勞加咗碼，當獎勵自己啦！」至於Anjaylia笑言除酬勞加碼外，她的磅數亦有增無減，她說：「今次好開心可以同Evelyn去日本拍嘢同食好嘢，我哋不停係咁食，結果肥咗五磅返香港。」