高海寧昨日身穿H&M吊帶低胸花花裙，出席商場舉行的婦女節《高跟．高貴》宣傳活動，向來愛穿高踭鞋的她，穿上當年面試港姐的3吋高踭鞋亮相，她表示這對鞋意義重大，更是媽咪花5、6千元送給她，所以一直好好保存。

劉青雲顧家又好肉，是高海寧心目中的Dream Man。資料圖片

高海寧手持針線為鞋加工裝飾，盡顯細心一面。

最重要有Feel

問到揀男友是否要求「高人一等」，她說：「我鍾意高嘅男仔，要有6呎2吋！（如果冇呢個高度呢？）條件係咁講啫！如果有Feel就得o架喇！（好似王祖藍咁矮過你又得唔得？）得，但我嘅Dream Man未出現。（梁朝偉咁樣？）唔係，我鍾意劉青雲，我未見過佢，但覺得佢係好男人，好好肉地，好好攬！」

高海寧還自爆穿高踭鞋的瘀事：「試過着住高踭鞋出街，點知個踭攝住喺坑渠蓋罅，好彩有個同行嘅男士幫手，我着住裙唔可以烏低身，又整唔到個踭出嚟，好尷尬！（最多着幾吋高？）可以着到5吋高o架！好安全！」難怪她在活動上腳踏3吋高踭鞋仍可示範跑步！