台灣模特兒沈志明早排拍咗萬寧廣告之後，即刻成為港女甜心，搞到小小So都好似廣告咁講：我真係有少少鍾意咗Kui！小小So知道沈志明喺台灣可以話係搶手嘅廣告男主角，之前同桂綸鎂等女星合作，人氣急升唔單止豬籠入水，連佢間髮型屋生意都帶旺！
原來沈志明本身係髮型師，同朋友喺台北開髮型屋，有次行街遇到星探先抱住玩吓無妨嘅心態入行，佢話自從喺台灣推出廣告後，髮型屋生意愈做愈旺，門口仲有唔少人圍住，因為想睇吓佢真人係點。小小So問佢咁靚仔，係咪好多女仔上門幫襯？沈志明話的確係多咗女仔嚟幫襯，有次有個女仔本來話係洗頭、剪髮，指定叫佢落場做之餘，個女仔仲問自己好多嘢，問到剪完髮都唔捨得走，突然又話要染髮做Treatment。
小小So問係咪個女仔真係「少少鍾意咗Kui」而唔走，沈志明笑住話唔知係咪，仲話好怕女仔太熱情，所以最後佢藉口話有嘢做要走先，搵第二個同事幫手先甩到身！