楊千嬅、敖嘉年、徐子珊、周秀娜（Chrissie）及廖碧兒等昨晚出席電影《抱抱俏佳人》記者會，早前敖嘉年拍戲時遺失手提袋，有傳千嬅爆料暗示Chrissie捲入風波，昨晚她們出席宣傳活動，千嬅首先發功，笑說：「為咗證明我哋唔妥，叫Chrissie過嚟摑一巴。」不過兩人相距太遠，Chrissie聽不到亦冇反應。

千嬅作狀掌摑周秀娜，做戲咁做。

雙手合十的千嬅行過周秀娜身邊，煞有介事。

千嬅還笑言聽聞敖嘉年用伽俐略精神捉賊，並已掌握線索，問到是否覺得無辜？她說：「慣咗，對部戲都好，依家冇緋聞寫就寫呢啲，同Chrissie開工有傾有講，大家仲多咗傾偈添！」其後千嬅即被工作人員拉往入座，亦主動坐在Chrissie旁邊，還扮摑對方一巴，場面爆笑，兩人又搭膊、傾偈交戲，敖嘉年主動排排坐，三人合照大團圓結局。昨晚乃事發後三人首次見記者，對於不和傳言，Chrissie說：「唔係，開工有講有笑。」記者指他們做戲做全套，是否宣傳橋？她笑說：「開工都要做戲喇！（相處點？）好開心，同千嬅開工一直開心。（有冇尷尬？）冇講件事，大家知唔係真。（同千嬅開工打醒十二分精神？）戲裏面佢做我上司，梗係要打醒精神。（有報道話千嬅暗示你捲入風波？）冇睇報道，我冇做過。（心裏有刺？）唔係真，梗係『銀』住，心裏有刺。（同千嬅可否做朋友？）做到嘅，大家都係潮州人。」

交警方處理

至於失主敖嘉年揚言事件已交由警方處理，暫時未有進展，他說：「我唔見咗身份證、銀包同鎖匙。（報道話千嬅有所暗示？）唔會，傻豬仔嚟嘅，未聽過千嬅咁講。（開工尷尬？）冇，從來冇懷疑任何人。」