去年黃長發與三奶李姿霆（Karen）的姊弟戀由開始至分手，皆成為城中熱話，最近又因一段疑似黃長發的情慾片段，令原本歸於平淡的他又再成為新聞人物，更有相士批他今年會有桃花劫！

Karen昨日表示未看過情慾片段，但她揚言阿發女友多多，被片中女主角整蠱亦不足為奇 ：「我睇啲報道，嗰啲相全部都唔見個女主角個樣嘅，阿發可能就係畀嗰個唔見樣嘅女仔整啦！（女主角唔係你咩？）梗唔係啦！我都想有咁長嘅腿，同埋嗰條白色底褲都唔係我。（你哋拍拖時有冇試過拍情慾片段？）冇喎！佢從來都冇要求過！（有冇擔心？）我冇拍過就唔使擔心，要擔心都係阿發自己啦！（有相士批阿發有桃花劫？）我同佢一齊時，就真係桃花劫嘞！但佢依家有冇桃花劫我就唔知，我目前係單身，一個人生活得好舒服。」

累公司被叫停業

而正在模特兒公司上班的阿發，因事件惹來大批記者追訪，前日當他出外午膳，過馬路被拍照時險象環生，阿發有見及此，昨日選擇留在公司買Pizza作午餐，有指晚上亦有跟隨公司出席謝安琪的《龍圃花園慈善藝術展開幕》活動。而阿發公司的負責人霍小姐則說：「阿發唔回應嘞！免愈描愈黑，佢只係普通人，畀啲空間佢，我哋全公司都支持佢嘅，不過最近因為呢件事，我哋公司受到壓力，因為大廈啲人投訴阿發惹來大批記者，大廈方面叫我哋停業，等件事丟淡啲先開工。（你哋會唔會叫阿發停職？）我請得佢就預咗，當然唔會，全公司都支持佢。」