緋聞男女陳豪與佘詩曼昨日齊齊現身荔枝角公園，為古裝劇《公主嫁到》開工，劇情講述互相憎恨的陳豪及阿佘，由於被迫結成夫婦，兩人無計可施下惟有在人前扮恩愛，十分搞笑！同場參演的還有陳敏之及陳法拉等。

一直合作無間的陳豪與阿佘，雖然在《宮心計》中已有不少對手戲，但直到近日拍攝《公》劇時，兩人才首度傳緋聞！除了被指於拍劇期間眉來眼去，陳豪更被指以咖啡攻勢冧掂阿佘！由於緋聞傳得熱烘烘，就連與陳豪傳緋聞的廖碧兒及其父親亦被「拖落水」，阿佘最終忍不住開腔表示已「踩到底線」，事件愈鬧愈大！

陳豪與阿佘有講有笑，未受緋聞影響而有所避忌。	陳豪與佘詩曼不用埋位便對稿，未有如報道般眉來眼去。	阿佘笑言因頭飾太大，曾鬧出不少笑話！

雖然陳豪與阿佘飽受緋聞困擾，但依然無損其專業精神！現場所見，他倆並沒有如傳聞所指般眉來眼去，相反感覺似是一對甚有默契的拍檔。拍劇時鮮有NG之餘，不用埋位時便埋首對稿，神態自若兼有講有笑，彼此極為融洽，絲毫未見半點尷尬。

陳敏之受傷戴頸箍

相反，同場的陳敏之則顯得冇厘心機，每完成一個鏡頭後更即時戴上頸箍護頸，未知是否拍劇弄傷。記者事後致電求證，敏之承認頸部確是受傷，皆因拍劇時所戴頭飾太重，更出現嚴重後遺症，膊頭、左右手及手指全受影響！除了左右手麻痹外，手指更腫至連戒指也戴不上，她說：「搞到失眠瞓唔到覺。」

至於阿佘亦指頭飾很重，雖然未有像敏之般傷及頸部，卻因頭飾而發生不少麻煩及搞笑事：「個頭飾重之餘仲好高，搞到揸唔到車好麻煩，靈活性又低。之前我拍《宮心計》就試過戴住頭飾揸開篷車！因為頭飾太高頂到車頂，試過我要『開天窗』等個頭飾凸出架車外面，好搞笑！」