電影《財神到》前晚舉行首映禮，譚詠麟（阿倫）、楊千嬅、官恩娜及鍾鎮濤等出席，內地22歲女新人鞏新亮谷胸登場，非常養眼，頓時成為焦點，阿倫更搞笑地叫所有人讓開，等她站在中間，並大呼：「嘩！佢事業線好強！我同佢有對手戲o架！佢喺戲入面仲要勾引我，不過當時條事業線冇咁勁。」
千嬅被問到有否向校長請教生仔秘笈，她笑說：「冇喎！我事業心強囉！（但你冇事業線喎？）事業線每個人生喺唔同位，我生喺額頭。」至於有指她因妒忌周秀娜「事業線」而暗示對方捲入敖嘉年遺失手袋事件，千嬅笑說：「我喺娛樂圈15年，要一個女人個胸大過我唔難，我嫁咗啦！冇緋聞咪寫呢啲囉，唔緊要，當係宣傳。」適逢前晚是鍾鎮濤新舊曆同日生日，演員送禮物慶祝。
