17/02/2010

播放本新聞相關短片

陳百祥豁達:係一個解脫

於1990年加入明星足球隊的尹志強(尹佬),昨晨與世長辭。他的好友兼波友同感難過與惋惜,陳百祥則表示尹佬的離開,對尹佬來說是一個解脫。

熱愛足球的尹志強,與譚詠麟、曾志偉、陳百祥(阿叻)、黃日華和羅家英等組成明星足球隊,除踢波外更常做善事,善心爆棚!

據知身在外地的曾志偉及譚詠麟已接獲尹佬的噩耗,而明星足球隊一眾成員對於摯友撒手塵寰,亦大感依依不捨。現正身處美國的阿叻,被問到知否尹佬逝世?阿叻說:「有朋友話我知呢個消息,對尹佬嚟講係一個解脫,都拖咗咁多年。」至於剛從柏林回港的成龍,聞訊後亦大感愕然,他靜默了一陣子才說:「對佢嚟講係好事嚟,係一種解脫,唔再痛苦,我識咗佢好耐,但亦都好耐冇見,希望佢家人節哀順變。」

郭富城大感惋惜

尹佬波友張國強,與對方識於微時,他說:「當然唔開心,大家都唔想發生,同佢有好多回憶,不過正面啲睇,都叫過咗個年,我當時冇喺醫院陪佢最後一程,聽講佢去得好安詳。」張國強又表示現階段不想打擾米雪:「知佢會幫手處理身後事,明星足球隊會協助,但依家仲過緊年,我哋仲未開會。」

同樣喜歡踢波的郭富城,對於尹佬的逝世大感惋惜,城城說:「足球界失去咗亞洲第一中鋒,令人好惋惜同難過,希望尹佬一路好走,亦希望佢家人節哀順變。」

明星足球隊一分子的余少寶,得悉尹佬死訊感到哀傷,受訪期間禁不住痛哭,她說:「佢同病魔搏鬥嗰陣意志好好,我識咗佢16年,佢對後輩好好,畀好多意見,佢仲做媒人介紹男仔畀我識,尹佬好錫我,我當佢係哥哥。」她表示尹佬患病後,因不想朋友擔心,故婉拒與朋友見面:「有一次買嘢託米雪送畀佢,仲講我哋每個心都祝福佢,米雪話尹佬收到禮物後好開心。」

至於同樣是明星足球隊的有線主播衞志豪,則謹記尹佬對他的教誨:「佢話如果見到有人有嘢要幫手,唔好等人搵你,要自己主動同積極,佢待人接物好成功,我以佢為目標!」他表示一個月前曾探望尹佬:「佢嗰時喺床上,唔可以落床,精神幾好,能夠應對,佢有聽賽馬消息消遣。(對死訊愕然?)有心理準備,每次託米雪問候尹佬,佢從來唔會表現傷感,好堅強。」

回應

李修賢(曾合作電影《執法者》):「咁大件事?佢為人好好隨和!對上一次見佢係去年,好可惜!」

王晶(曾找尹志強演出兩部電影):「大家都知佢好人,好可惜!好幾年冇見,都係嗰句好可惜……我都唔識點講。」

劉偉強(曾合作《無間道》系列):「好心噏,我以前好鍾意睇佢踢波,覺得佢好犀利,之後有機會同佢合作拍戲,好開心!雖然佢唔係專業演員,但係好勤力同用心,成日攞劇本同米雪研究,佢哋好恩愛。」

洪金寶(曾合作《冇面俾》及《東方禿鷹》):「個心好唔舒服,我同佢以前成日都喺埋一齊,覺得佢係個好好先生,好樂於助人,我上年見過佢,佢都好精神,依家我真係講唔到落去,好難平復!」

專案組