鍾楚維

司職中鋒的尹佬，出道初期曾被稱為「鍾楚維二世」，對於當時的這位接班人，有香港最佳中鋒之稱的鍾楚維依然有讚冇彈：「落到場又搏命，一出道就好快上位，佢好虛心學習，唔好話教佢嘢呀，大家互相分享吓，佢好肯聽同好肯去做。我好高興有佢做我嘅接班人。」退役後，二人在商場並肩作戰，一起營商十多年。

劉榮業

與尹佬在香港隊南征北討多年的「蠱惑仔」劉榮業，不勝唏噓：「好可惜，一代中鋒就咁就過咗身……」他大讚尹佬有情有義：「佢好好人，朋友出到聲，佢幫到實幫。」正因尹佬唔話得，所以劉榮業亦表明，只要尹佬家人有需要，他都會義不容辭。

黃文偉

尹佬當年加盟南華後，便與「神童偉」黃文偉成隊友：「佢份人好到不得了，又好玩，有佢喺度根本唔會有悶場。我哋好好朋友，退役之後成日一齊去旅行，去咗半個地球咁滯！」他說：「佢離開係可惜，但亦係一種解脫，佢撐咗好耐，係時候休息吓。」

梁能仁

當年南華在名帥「吳飛」吳偉文執教下，曾兩季稱霸聯賽，當時前線有尹佬衝鋒陷陣，中場由「陰毒仁」梁能仁校炮：「尹佬頭槌好，我踢中場畀波都會容易啲！」他又指尹佬偶然也會打吓麻雀仔，亦因此與雀壇高手「大哥瑜」蔡育瑜十分老友。