相識36載,Peter與尹佬亦師亦友、肝膽相照。Peter憶述1974年在黃文偉介紹下認識尹佬:「當時我只係球迷,佢靚仔健碩,大家都鍾意運動,我教佢滑水打棒球,佢就教我呢個番書仔做人。雖然我大尹佬12年,但佢好識人情世故,成日點醒我點樣處世,大家真係Friend過打Band。」83年,Peter成為南華教練,與尹佬老死到做同屋住,合租沙田第一城:「後嚟佢開始同米雪拍拖,我就醒目搬走咗。」Peter搬往沙田村屋居住,及後尹佬得知Peter的樓上單位出租,即搬往與他做鄰居。
讚生存鬥志極強
對於米雪,Peter同樣有讚冇彈:「佢哋雖然冇結婚,但感情昇華到唔使結婚嘅階段。尹佬咁多個女友我都見過晒,但由結識米雪第一日開始,就知佢冇揀錯人,因為米雪真係好女仔,好通情達理。咁多年嚟,佢哋從來冇其他緋聞,亦冇嗌過交。到尹佬後來患病,米雪對佢照顧無微不至,好多時拍完劇攰到死,都照去醫院陪尹佬,又搵好多特效藥畀佢。同病魔搏鬥期間,佢兩個都好辛苦,但從來冇怨天尤人,佢哋都明白Life must go on嘅道理。」
尹佬一生都為他人着想,對朋友非常好,Peter續說:「近年我住新加坡,每個月返香港都會探佢。佢對個個人都好,每次都流露極強生存鬥志,唔會畀身邊人難過。近年佢有病,最大興趣係賽馬,成日同我傾馬經。對上一次見佢係一個月之前,當時佢仍然好有Spirit,但無奈生老病死係人生必經階段,尹佬已經奮鬥咗咁多年,呢次Say Goodbye,對米雪、家人、朋友都算係一種解脫。」他坦言以認識尹佬為傲:「好高興識到呢個朋友,直頭係有今生冇來世。佢人好EQ高,對愛情專一,諗嘢透徹成熟,好多嘢值得世人學習。」
余錦遠嘆朋友損失
至於尹佬生前另一好友余錦遠,其子是尹佬的契仔,他指尹佬很喜歡小朋友,在世界各地亦有助養兒童:「最後一次見佢係去年11月,當時佢好瘦,大家都好心痛,佢講嘢好吃力,但每次見我哋都會撐到好精神。」他形容尹佬的逝世是朋友的損失,其永不言敗的精神,是港人學習的榜樣。

