女子組合HotCha嘅Regen（張惠雅），之前拍嗰套《五味人生》出咗街，小小So都有睇，第一集開始就見到Regen以好四正嘅「巨胸格格」造型出現，同佢戲中師傅郭晉安扮嘢呃錢，嗰日小小So喺街撞見Regen，同佢講開個造型，身材細細粒嘅Regen一輪嘴咁講感受。
Regen：因為要着嗰套宮廷衫，我要戴幾個有墊嘅胸圍先墊到咁大。
小小So：點解要墊呀？
Regen：因為着嗰啲衫應該有啲效果，我冇咪要墊囉！硬係睇唔慣自己咁大個胸，搞到我拍嗰陣成日攞件衫遮住，遲啲有啲戲份要扮妓女，又要裝胸。
Regen單拖拍劇，兩個拍檔Winkie同Crystal都有捧場，佢哋仲齊齊話喺螢幕上嘅Regen真係好似楊思琦，不過Regen就話有啲朋友覺得佢似「兒童節目長青樹」譚玉瑛姐姐，大家覺得佢似邊個？