早幾日小小So去土瓜灣某幢大廈探個朋友，點知撞到冇見一排嘅丘凱敏（Anna），小小So即刻走去同佢傾吓偈啦！先知原來佢最近為套禁毒電影寫古仔，問佢要有咩預備？佢就話事前要親身去戒毒所訪問啲吸毒人士，佢好感慨咁話：「好多吸毒嘅人都好細個，12歲都有，15歲已經係拆家！訪問完佢，我最深印象嘅係覺得朋友影響力真係好大，好多吸食者都係話朋友介紹先開始食，所以真係要小心選擇朋友，近朱者赤，近墨者黑！」
提到同佢同經理人嘅散打王崔建邦，Anna即刻力撐對方：「我認識嘅崔建邦係個好有禮貌嘅人，完全唔覺得佢有暴力傾向。」問到覺唔覺得係個女仔博宣傳？Anna就話可能係女仔個經理人安排，仲話個女仔都未必想，但無論點都好，呢件事應該私下解決，而唔係公開等人批判，最希望就係崔建邦盡快冇事喎！