張致恒（Steven）昨日自爆17歲失身，高峰期更曾一腳踏三船，傷透女友的心，不過自從信主後，心態已逐漸調適，他說：「信主兩年『紮咗』好耐，依家冇女朋友，想搵個終身伴侶同老婆囉！真係好欣賞高皓正，佢傳道時連以前『自瀆』都肯同大家分享！（有冇試過搞出人命？）冇！我會戴套。」
對於好友關智斌被指與張敬軒同居，問到會否勸對方坦白承認？Steven說：「佢不嬲都坦白。（同你分享性取向？）冇！（信唔信佢同軒仔一齊？）冇話信唔信，總之我信主同自己！（佢好鍾意軒仔？）點知！我夠鍾意佢！（支持佢哋公開關係？）我唔會講囉！」
