昨日《蘋果日報》指無綫劇集《老友狗狗》涉竊取亞視未開拍的同名劇，並暗示有創作人的操守出現問題。無綫製作部總監曾勵珍昨日率領《老》劇監製梁材遠、編審蔡婷婷於電視城召開記者會，以正視聽。席間，無綫外事部副總監曾醒明手持《蘋果日報》說：「無綫睇到呢篇報道非常震怒！因為對同事唔公平，現交由法律部門去信《蘋果》跟進，報道對無綫信譽有影響，影響廣告商嘅睇法，所以要澄清！目前以『聽其言，觀其行』態度處理！」

鍾嘉欣指創作並非難事，故不相信同事竊取。

蔡婷婷、梁材遠及曾醒明在記者會上齊齊聲討《蘋果日報》。

蔡婷婷誓討清白

珍姐亦愈講愈火：「大家都用心用力做！依家畀人砌『竊取』罪名，講到好似做賊偷人嘢咁！好大傷害！我哋同傳媒關係唇齒相依，以前有類似事件，但今次指控好嚴重，好難啃得落！有冇搞錯！（有睇過亞視套劇？）佢哋拍咗出嚟咩？畀個天書、橋段同故事大綱我睇吖！有點解唔拍呀？（傳冇錢開拍？）個古仔係我哋三個腦諗出嚟嘅！（暗示創作人操守有問題？）邊個員工吖？叫佢講個名出嚟！」她又力撐《老》劇幕後用心創作，並稱該劇於07年5月已存在，劇名本為《好狗出更》，屬編審蔡婷婷的個人構思，而她已効力無綫十多年。

至於編審蔡婷婷呼冤時更熱淚盈眶：「我05年開始養狗，個構思係想將正確嘅養狗訊息帶畀觀眾，所以提議畀材叔（監製梁材遠）！我唔覺得過程係抄襲，如果係抄，就係抄我同隻狗嘅經歷！今次我覺得好侮辱，呢啲係創作人心血，不明不白負上罪名好傷害，要攞番個公道同清白！」

馬浚偉力撐原創

而《老》劇主角鍾嘉欣、馬浚偉和鄭則士，昨日齊齊力撐公司的追究行動。嘉欣更認為創作非難事，故不相信是竊取。而馬浚偉昨晨已就事件與無綫通電話：「污衊咗創作同事嘅精神！傳媒唔好斷章取義啦，仲話我哋抄到同名兼同內容？日本夠有套電影叫《老友狗狗》啦！又唔話我哋抄佢？而我哋套劇原本個名係叫《好狗出更》添！點會係抄呢！珍姐做製作咁多年，遇到呢啲事當然震怒啦！」