官恩娜（Ella）因為一曲《Endless Love》而升呢，接Job接到手軟，加上同外籍男友感情穩定，愛情、事業兩得意！佢之所以咁成功，除咗因為有實力，仲同佢樂觀同冇架子嘅性格好有關係。
睇住Ella入行嘅小小So，每次見到佢都雞啄唔斷，雖然大家最近都忙，少咗見面，但唔代表Ella會忘記小小So！話說有一日，小小So同朋友行緊街，突然身旁出現一把女聲話：「咪郁！打劫！」小小So畀佢嚇一跳，定一定神之後，就見到Ella好鬼馬咁望住小小So，仲一輪嘴咁講：「我好忙呀！又要做呢樣，又要做嗰樣，今晚個活動又要着對好特別嘅鞋喎！我都係趁有半個鐘頭Break，竄過嚟旺角拎鞋咋！咦？你隔籬嗰個好靚仔喎！Hello，我係Ella呀！」
正當小小So想回番一、兩嘴嘅時候，Ella突然見到有啲好靚嘅首飾，即刻忘記咗小小So嘅存在，掛住同助手研究！小小So心有不甘，走去佢面前話：「又話趕時間？」佢即刻扁嘴話：「唓！好叻咩！睇吓嘢犯法咩！」然後就Say Goodbye喇！小小So個朋友之後好感嘆咁話，如果唔係因為Ella化咗妝同有人氣，真係以為佢係普通女仔一個，因為實在太Friendly喇！