形象百變兼獲獎無數的天后容祖兒，剛好在樂壇度過黃金10年，邁向3字頭的她已經滿肚密圈，由年頭忙到年尾。雖然舞台經驗豐富，但她表示要繼續尋求突破，保持創作的「飢餓感」，並在歌路及形象上大搞花臣：「要放低無謂嘅包袱。」

榮升「Kubi老竇」的基仔，將開設潮服店闖商界。

祖兒入行十年，今年決定主攻國語市場及再踏紅館舞台。

入行10年感激支持

祖兒已定下目標，發力強攻國語唱片市場及炮製最佳專輯：「今年係真正開始，我會專注唱好啲歌，年底喺紅館開騷，呢啲計劃聽落好似好易，但全部都不容有失。」圈中人緣極佳的她，早前舉行入行10年紀錄片首映會，獲不少圈中好友捧場，令祖兒十分感動：「我覺得自己幾富有，身邊朋友咁錫我，我哋係真心用時間交流。」

至於基仔在唱歌、拍戲、廣告及擔任節目主持方面都能手到拿來，早年設計的Kubi公仔大獲好評，自此便升任「Kubi老竇」，今年基仔再向商界發展，開設潮服店升呢做CEO，雖然要兼顧工作，但基仔都樂在其中，問到是否榮升「吸金王」，他笑說：「我只知係爛Gag王，我都係搵兩餐，今年會再搵多兩餐。」

喜歡小孩恨生BB

自主持《係咪小兒科》後，基仔更懂得與小朋友相處：「我不嬲都鍾意同小朋友玩，依家對小朋友唔可以太嚴肅！」基仔坦言恨有小朋友，但目前未有生育大計：「見到家樂仔同克勤做咗老竇，戥佢哋開心，搞到自己父性大發，但每個人嘅古仔都唔同，要嚟嘅就自然會發生。」