回顧過去一年，傅穎（Theresa）可謂波折重重：「有師傅話09年比較衰，過咗今年就OK！」雖然師傅預測準確，但Theresa竟未有追問來年運程，只想趕走負面新聞：「想趕走負面嘢，其實我都明白呢個圈走唔甩，之前有搞到唔開心，覺得畀人哋誤解！」

盼覓真愛

Theresa憧憬明年會更好：「希望身體健康，依家搵小肥嘅教練朋友幫手操Fit，想操啲肌肉，轉跳舞路線！」她的第二個願望是再出碟：「開始練歌，想搞新意思！同公司提議自己嘅諗法，有國語同廣東歌，有幾首唔同Style嘅歌，仲會有寫真。（性感？）唔介意！因為係轉公司嘅第一擊。（底線？）最盡都係三點式！」

她不諱言與鄧麗欣有競爭：「良性競爭，唔想話同邊個撼，希望做好自己。」早前到台灣發展的她學講台語「我鍾意你」冧Fans，她渴望得到真愛：「我想要真桃花，好過傳假桃花，拍拖順其自然。」