型女吳雨霏（Kary）十分玩得，面對「大起底」問題時均認真作答，表現大方的Kary，更不介意男友(目及)女！
喜好及感情篇
問：最討厭男人類型及壞習慣？
答：扮晒嘢同造作懶醒嗰啲，仲有係冇禮貌、欠風度都好憎。
問：覺得邊個男星係老公最佳人選？
答：畢彼特，佢好靚仔有型、有品味、男人味爆燈、演戲又叻，簡直冇得頂！
問：忍唔忍受到男朋友成日(目及)女？
答：都OK嘅！
解碼：與「網球王子」洪立熙傳緋聞的Kary坦言，能夠忍受另一半「成日(目及)女」，她笑說：「當然係唔想啦！但對眼天生出嚟係望嘢，望吓又唔代表啲乜！我自己都會(目及)女，睇吓佢哋打扮同造型。」
童年及回憶篇
問：細個有冇同過男仔打交？
答：同自己細佬試過，亦試過同女仔爭嘢玩，大家鬥扯頭髮。
問：幾歲開始拍拖？初戀嘅感覺係點？
答：14歲左右開始。
問：初吻係幾多歲？講吓當時感覺？
答：17歲，第一次有啲緊張，但又好自然，好Sweet。
解碼：思想早熟的Kary，於14歲已嘗初戀滋味，她說：「個男同學大我一年，本來同我一間學校，但後來佢去咗另一間讀，嗰時拍拖都係約埋一齊放學，佢有時打籃球，我都會去捧場支持佢，係好純純嘅Puppy Love。」
個人習慣篇
問：你覺得自己係咪購物狂？
答：都唔算，我鍾意睇多過買，而且買嘢唔會買得好過分。
問：最貴一樣嘢係幾多錢？
答：上年用咗11,000蚊買咗對Boot，我會同自己講，買咗可以着幾年，個款好Classical，而且我成日着就會抵番。
問：係咪見到鏡就會撲埋去照？
答：係，慣咗！
解碼：Kary坦承自己貪靚和姿整，她說：「作為歌手藝人，每次出騷或表演前，都會慣咗望鏡，費事出現瑕疵甩漏，而且我好注意儀容，又慣咗對鏡練歌排戲同唸對白，習慣成自然。」