鄧萃雯

楊怡被網友批評不配於《萬千星輝頒獎禮》得兩獎，出爐視后雯女替她反擊：「網民係咪真係識睇戲？」

解讀：雯女呀雯女，咁多網民撐你攞視后，依家你質疑佢哋，好似有少少過橋抽板喎！

劉嘉玲

早前與梁朝偉共慶生日的劉嘉玲，大讚老公每年花心思為她揀選禮物，當日亦與家人及幾位密友在家中食飯慶祝，問嘉玲生日願望時，她說：「人愈大愈希望簡單。」

解讀：睇嚟嘉玲嘅生日願望都幾難實現，事關之前張曼玉喺《金馬獎》講到明想出年可以同嘉玲、偉仔同台頒獎，傳足廿幾年的緋聞再被提起，想簡單都難！

鍾嘉欣諗計避街坊

鍾嘉欣近日被街坊爆料指經常出入伍允龍寓所，她直指報道有趣：「做藝人唔只要避狗仔隊，仲要避埋街坊。」

解讀：做人行得正企得正又有咩要避呢？街坊都係實話實說，相信佢哋唔會砌嘉欣生豬肉，怪就怪嘉欣真係去得多到連街坊都認得佢啦！

趙碩之低胸誘龍友

趙碩之（Wylie）以低胸女僕Look出席亞洲遊戲展活動，波濤「胸」湧的她即時成為全場焦點：「我覺得呢一身衣着好奇怪，着咗會畀龍友追住影，驚人哋嘅性幻想會增強！」

解讀：Wylie唔着呢件低胸女僕衫仲奇怪，實冇龍友追住佢嚟影！不過唔緊要啦，就算佢着樽領衫，一樣會令唔少電車男增強性幻想！

王希瑤想闖荷里活

有「翻版李嘉欣」之稱的亞姐亞軍王希瑤，賽後仍未跟亞視簽約，但已積極與章子怡及鞏俐的經理人曾敬超聯絡，她說：「希望可以幫我打入荷里活。」

解讀：繼鄧麗欣之後，又一位「自信爆燈」嘅藝人，除咗恭喜佢目標係做「翻版章子怡」之外，都係嗰句啦，佢大可以去吓同名商場闖吓先。

楊宗緯亂噏談戀愛

楊宗緯（左）在《亞洲星光大道》與最後兩強羅力威及亢帥克對唱《背叛》，被司儀笑三人似斷背，楊宗緯亦笑說：「感覺好像在談兩段很好的戀愛。」

解讀：羅力威同亢帥克仲係新人，楊宗緯咁講，分分鐘搞到佢哋性取向被懷疑！