汪明荃和羅家英昨日到奧海城宣傳粵劇《德齡與慈禧》，問到如何度過婚後首個聖誕節？家英哥透露剛由銀川登台返港，未與汪阿姐過聖誕，但買了銀川枸杞子給阿姐作聖誕禮物，汪阿姐則買了冷衫，家英哥更即場穿上阿姐送的冷衫晒恩愛，他說：「着咗件衫係咪特別溫暖？係醒神啲。（第一個聖誕節就分開？）都慣，所以過元旦唔接工作陪阿姐。（元旦點過？）未諗到，可能去食餐、行街、倒數。」
阿姐則說：「去倒數？想喺屋企休息。（佢唔接工作陪你？）我夠唔接咯！就嚟演出粵劇，想休息夠。（婚後首個聖誕節就分開？）佢成日周圍走，但我哋都有SMS，仲用視像傾偈，佢次次打嚟都好夜，所以我成日都係着住件睡衣。」
