吳家樂：同崔建邦都幾好朋友，佢好有禮貌好傾得！（暴力傾向？）唔會啩！我知佢好鍾意打拳同做運動，不過依家話有件咁嘅事，要查過至知！

陳偉霆： 完全唔知發生乜事，唔知佢有新女友。唔信佢打女人，佢好照顧朋友同女仔！知佢識泰拳，我覺得郁手唔關識功夫事，我信佢為人，會打電話慰問。

James@Square：我同鄺敏慧拍過一個廣告，我哋接觸唔係咁多，私底下都唔算熟。未證實件事係咪真，唔方便講，但點都好男人唔應該打女人。

林子萱：個女仔係咪博宣傳？崔建邦話係普通朋友，聽到呢件事都好奇怪！佢唔會打女人！（脾氣暴躁？）唔覺，平時食飯傾偈，未見過佢發脾氣。

甄穎珊：我同崔建邦都飲過嘢，不過私底下就唔係咁熟。不過佢份人都幾紳士。（涉打女人？）我唔信囉！況且佢依家上緊位，我唔相信佢會咁樣做囉！

胡蓓蔚：吓！冇可能，點會打人！（涉打緋聞女友鄺敏慧？）邊個嚟，未聽過！（女仔報警驗傷？）平時好有風度，搞清楚唔好亂寫。

宋熙年：唔會發生咁嘅事！我同佢合作過，佢好有耐性，我都冇見佢鬧人，更未見過佢發脾氣！（打畀佢問吓？）過咗件事先。

龔嘉欣：我哋一齊主持《東張西望》，佢對女仔好有風度！（涉打女仔？）唔知發生乜事，唔知真定假，我可以話佢為人冇問題！

戴夢夢：點都好，喺任何情況下男仔打女仔都係唔啱，任何事解決唔到，都唔使郁手郁腳，感情係兩個人嘅事，總之打人就係唔啱。