年僅17歲的「翻版阿Sa」周凱盈（Monique）涉嫌藏毒，其新廣告未能如期推出！手機遊戲廣告品牌PKMM兩個月前邀請Monique、鍾蕙芝（Lavina）及勞詠君（Tian）拍廣告，在麻雀遊戲中展出其肖像，但昨日廣告商總經理陳先生宣布正考慮抽起Monique的所有遊戲照。

新舊人無一幸免

Monique的前經理人張達鴻（Admond）在活動上強調，早已沒有與她續約，亦對事件感失望：「之前花咗好多時間培訓佢，好失望。」他還表示Rainbow（胡心諾）為保形象經已戒煙，並透露公司正計劃要求旗下模特兒驗身，以監察她們有否吸毒，他說：「我哋之後會喺Sony嘅Game模揀蟀，都有機會要求佢哋交驗身報告。除咗新人外，Lavina同Rainbow等所有舊模特兒都要驗！為咗去蕪存菁，我希望每人最少兩星期交一次驗身報告，會包括驗毒。（加重公司負擔？）一定會！不過我哋要清楚每一個旗下模特兒嘅近況，呢個計劃保障公司同模特兒。而公司會負責舊人嘅驗身費，而新人就自己畀。」

Rainbow願身先士卒

與Monique屬舊同學兼同期入行的Rainbow對計劃大表支持，希望有助宣揚禁毒訊息：「如果有機會推行，我會第一個去驗。（唔怕麻煩？）唔麻煩！驗血都要定期啦！公司唔驗，自己都會去驗，係好小嘅Test！（公司唔畀錢？）自己畀都去，一人一半就最好。」

周凱盈（左）因涉藏毒，被廣告商抽起廣告。

Rainbow支持公司每兩周驗毒一次的計劃。

Lavina出席活動時即與Monique劃清界線：「我哋只係相識一場，私底下冇聯絡，亦冇佢電話。」她表示會支持公司的新計劃：「如果冇吸毒，怕乜驗！我覺得係保障公司同模特兒嘅利益。（嚇怕新人？）公司信任每一個模特兒，其實呢個好似學生保健咁，只係普通驗身，依家仲要公司畀錢，當係平時驗吓身體毛病都好。」不過，勞永樂醫生指兩星期驗毒未必可準確地驗出有否吸毒，因毒品在72小時後會排出體外，建議突擊檢查更有效。一般驗身計劃不包括驗毒項目，尿液驗毒測試收費一般為數百元。