01/12/2009

播放本新聞相關短片

呂慧儀鑽飾出征 黃浩然期待進階挑戰

黃浩然、李思捷與呂慧儀等今年有份角逐「飛躍進步藝員」獎,其中黃浩然加入無綫不久,已拍攝多套劇集,今年更憑《東山飄雨西關晴》、《碧血鹽梟》及《廉政行動2009》三劇提名,似乎贏面甚高!不過,他坦言特別看好敖嘉年:「其實思捷同嘉年嘅表現都好好,兩個都係我好兄弟,我都想佢哋攞!不過我諗嘉年機會大啲,因為我都有睇佢喺《巾幗梟雄》嘅演出,的確唔錯,而且角色發揮空間好大!(對自己有冇信心?)我都係加入無綫一段時間啫!之前拍咗咁多套劇,有咁多嘗試,已經好滿足,希望之後有發揮更大嘅角色嘗試啦!」

至於首次在台慶獲提名的呂慧儀,則以《絕代商驕》、《謎》及《天賜良源》角逐「飛躍進步女藝員」,她對自己有信心的同時,亦看好勁敵陳茵媺:「我同陳茵媺係同屆港姐,而且今年佢喺《畢打自己人》同《學警狙擊》嘅演出,大家有目共睹,所以我都睇好佢。」為出席頒獎禮,她已找來珠寶公司贊助總值五百多萬元、共重100卡的鑽飾,而戰衣則是Alex Workshop本地設計師設計的香檳色低胸Deep V晚裝,相信會比早前的台慶夜更性感搶眼!