不少演員會慨嘆經典角色難求，但鄧萃雯絕對是一個例外，因為自回歸無綫後，她已遇上「如妃」、「Hilda姐」與「四奶奶」等好角色，難怪她也自誇未遇過低潮：「因為我一入行就做女主角。」
甫出道即擔正
雯女出道時，剛巧是翁美玲逝世，無綫正鬧花旦荒，突然在藝員訓練班中挑選幾位精英中的精英讀進修班，她便是其中一個，地位即時「升呢」，也變得雄心壯志，她笑說：「以前劉嘉玲讀藝訓班時都冇錢收，但我就有！之後無綫叫我簽三年合約，我話明一定要做重要角色，如果唔係就唔簽，好有自信。」一如所願，雯女甫出道已有機會與萬梓良合作《薛仁貴征東》，回想當年依然沾沾自喜：「真係好好彩，我哋同期仲有邵美琪、黎美嫻同陳庭威等，但我係第一個被揀中做女主角，當年仲係收視之冠。」
所謂「攀得愈高，跌得愈痛」，雯女的挫折或許不在事業上，而是所得到的太多，心靈反而覺得空虛，她說：「之後同無綫改簽部頭合約，90年代去登台好好搵，好快賺到第一桶金；另一個高峰係過檔亞視，幾年拍超過一百集劇集，搵到好多錢，狂掃名牌、買千萬豪宅同買靚車，一次旅行使幾十萬，做咗啲正常人唔會做嘅事，但其實個人好迷失同空虛！結果一次金融風暴，令我變成負資產，擁有嘅突然失去，嗰一刻真係好慘。」
戲中擅演女強人角色的雯女，現實中亦決定拋開一切，重拾書包去外國讀書，一別便三年半。回港後，她學懂珍惜所有，放下身段成就今日的成功，她說：「好感激珍姐（曾勵珍）搵我拍《Loving You》，講真，你唔係自己人，人哋冇必要捧你，所以返嚟拍戲真係由零開始。當時我已經睇得好開，唔介意演阿婆同扮醜，豁出去做好每個角色。」
「觀眾眼睛雪亮」
在娛樂圈浸淫25年，雯女自認飽歷風霜，難怪每次提起獎項也一副不耐煩，強調以平常心面對：「觀眾眼睛係雪亮，唔好睇就唔睇，邊個做得好、做得唔好大家會知道，獎項只屬平常心。」
後記：做大茄有發揮
可能做女主角做得太多，雯女笑言有時也希望做綠葉，曾經與廖啟智在合演的《生死頌》中做大配角，但其中一場戲已令她有很大啟發，她說：「戲中智叔做我男朋友，佢只得一集、一場戲、一句對白，但佢真係能夠喺十幾秒將觀眾帶入戲，呢啲就係真正嘅演戲。」
十一年前，楊怡加入無綫藝員訓練班，由無綫一手湊大，是名副其實的「親生女」。十一年後，楊怡憑《宮心計》的「金鈴」這大奸角挑戰逾二十年演齡的鄧萃雯，其實她也是身不由己。
楊怡的星運確是比家姐楊娜平坦，但並沒有佘詩曼般幸運，一出道便擔正做女主角。入行初期所飾演的角色，比路人甲乙丙更加悲壯，她說：「訓練班出嚟嘅女仔，大多都會飾演名妓。雖然我冇做過，但係我試過畀人浸豬籠！當時我同徐榮係姦夫淫婦，所以被罰浸豬籠，其實我真係對豬籠好抗拒，但係要硬住頭皮去做，成個人瞓落去又畀人抬起，嗰陣天氣又熱，真係好幸苦同尷尬，但其他演員冇因為咁笑我哋，反而最關心係我哋兩個，未Roll機就攞把傘遮住我哋，真係好開心！原來咁慘都有人關心，後來再諗捐入個籠度都幾好玩！」
喜得前輩尊重
自訓練班畢業後，楊怡聽過不少娛樂圈陰謀論，令她感到戰戰兢兢。可能是訓練班出身，她從未被人當作「茄喱啡」看待，反而有些前輩會稱呼她作同學仔：「我的確聽過唔少人話啲阿哥、阿姐好高傲，真係令我好擔心，但啲前輩冇當我係茄喱啡，仲叫我做同學仔添！我好自豪自己係訓練班出身！」雖然，楊怡確遇過某些藝人恃老賣老，但未減對他們的敬畏：「係有呢啲人存在，自己都感受過，但佢做得唔着迹，仲係對人人都係咁，反而覺得佢好有性格，只要唔太過分，我係唔會介意！」
阿姐細心提點
幸運的是，楊怡身邊總有前輩提攜，其中以阿姐汪明荃最疼錫她：「拍《婚前昏後》時，TVB想我簽經理人約，嗰時我仲細，始終唔知點為自己爭取利益，所以咪打畀阿姐問佢攞意見。佢真係好細心同我解釋點樣做，好多人話佢惡，其實佢係一個講道理嘅人，畀佢鬧得實係抵鬧！其實阿姐好似一個細路女，鍾意畀人氹同讚，係人之常情，我生日時，佢仲送咗個袋仔畀我呢！」
《宮心計》出街後，有人曾說楊怡有機奪視后，一時間被捧到上天，但她覺得現時不攞視后，才可達至「雙贏」局面：「我自己得到角色嘅轉變、觀眾嘅認同，係一個好開始，如果雯女攞我會更加開心，反而我最想攞係最佳劇集，先可達到雙贏面！其實我真係有賺，冇獎唔代表我輸，自己心目中已有成績表，已經有B+，但已離A不遠，哈哈！」
假大胸成轉捩點
「講到最難忘角色，我覺得係《賭場風雲》入面嘅譚珠美，呢個角色係我嘅Turning Point時（轉捩點），唔再演乖乖女角色，原來楊怡都可以演大胸同黐脷筋！如果我依家演一定會托大啲個胸，着衫再誇張啲，其實當時都好想有份提名，但世事難料呢！」
後記：人紅變得平凡
人紅了自然變成名牌奴隸，可是楊怡卻剛剛相反，選擇比未紅前更平凡：「我唔會話買名牌多咗，反而會諗多人識係咪會多折頭呢！呢期去普通舖頭買嘢真係平咗喎！哈哈！我不時都去金百利Shopping o架！」