黎耀祥去年憑《秀才遇著兵》奪得最佳男配角，現場掌聲如雷，比起男女主角的還要多，可見祥仔是公認的實力派演員。柴九一句：「人生有幾多個十年？」祥仔捱了雙十年華才有出頭天，難得的是，無綫大膽棄用靚仔小生，撮合他與鄧萃雯演出《巾幗梟雄》，結果收視和口碑均喜出望外，他說：「我從來冇奢望做男主角，一入行已經知道自己唔係主角材料，因為捧靚仔、靚女唔係罪。」這趟反高潮，祥仔笑言多得潮流帶挈：「觀眾睇得靚仔多，所以咪返轉頭睇番啲實力派，同時裝一樣係一個循環。」
闖影壇遇低潮
祥仔口中的「潮流」一等便是24年，當年他懷着一腔熱誠報讀小太陽文娛中心的演藝進修興趣班，雖然順利加入演藝圈，但演的都是行行企企的角色：「第一部拍《真命天子》，我只係做廚房工得一句對白。過咗好耐，拍《賊公阿牛》終於有機會做女主角黎美嫻嘅未婚夫，雖然集數唔多，但已經好開心。」
小角色，賺到的錢當然不多，慶幸祥仔是個量入為出的人，在無綫工作的12年間生活總算過得去。萬料不到離開無綫闖影圈後，反而令祥仔遇上人生最大考驗：「當時有老婆、生咗個仔，諗住唔搏就一世，初初都OK，但後來電影市道愈嚟愈差，試過一個月開一日工，基本上咩爛片都接，只係堅持唔拍鹹片。（屋企人好擔心？）老婆唔知o架！我份人比較傳統，男人係要擔起頭家，咩都自己諗掂。」
未肯傳授演技
日子再苦，也總算捱過，祥仔今年是視帝大熱，他直言無悔當日離開無綫的決定，認為是人生一次寶貴經驗，並直言能奪視帝當然是錦上添花，但目標仍是演戲：「我今年都有信心，但我演戲從來係追求個人滿足，希望演得好會得到大眾認同，如果唔係憑住呢個信念，可能一早走咗。」問到可會將演戲經驗傳授後輩？他笑說：「好多人搵我教戲，但仲諗緊。我相信天才論，冇天分嘅，無論點教都係嘥時間，我擔心如果我教嗰個人冇天分，但佢又好畀心機，就真係好尷尬。」
後記：拒再影結婚相
早前祥仔被人翻炒與前妻的陳年往事，但他仍能從容面對。不過祥仔依然有一樣堅持，他笑說：「老婆話咩都冇所謂，但佢成日話要同我同個仔影一輯婚紗相，呢樣我真係唔制！做嘢影相仲唔夠咩，寧願送多份禮物畀佢。」
很多人都有錯覺，誤以為「Laughing哥」謝天華有份競逐視帝。無他！因為Laughing實在太搶，試問在《學警狙擊》中，大家還記得誰是主角嗎？大抵答案總會答錯是Laughing。從前天華多做配角，如今他一炮而紅的也是配角，為別人作嫁衣裳的天華星途，亦是慢慢從一名大茄行出來。
憶起入行處男作《山水有相逢》，天華深知何謂人情冷暖：「我比較幸運，可能係『風火海』關係，第一套戲已經有對白，拍《山水》時，我要自己去石崗軍營拍外景，未埋位時，口渴就問茶水阿姐邊度有水飲，阿姐以為我係二打六，即時呼喝叫我自己斟！OK！自己斟冇問題，我覺得冇所謂，後來阿姐知道我係一個有對白嘅演員，佢態度突然180度轉變，對我客氣之餘，仲問我晏晝食咩飯，原來人真係識分AB，係可以隨時調節！」
佩服徐克氣勢
娛樂圈，有資歷的都是阿哥阿姐，耍大牌的傳聞不絕於耳，從前天華這種小角色，豈不是任人魚肉？他說：「So Far我未遇過阿哥阿姐喺我面前耍大牌，不過我見身邊嘅演員就遇過呢啲情況，不過呢啲演員都係掛住喺戲棚打機同瞌眼瞓嘅人，將心比己，阿哥阿姐見你不斷咁睇劇本，佢哋都唔好意思整你啦！我覺得呢行大部分人都係對事唔對人！」
不過，圈中確實有一個人令天華望而生畏，這人是鼎鼎大名的徐克導演：「當年我拍由徐克執導的電影《刀》，第一日入到片場，發覺點解咁靜嘅，冇人出聲，個個埋頭苦幹做嘢，工作效率奇快，有日徐導演親自寫張對白畀我，我只睇得明三成，睇極都唔明佢寫咩，我咪膽粗粗走過去問徐導演，佢就叫我問副導，因為佢要執位做嘢，徐導演就係一個咁有威嚴嘅人，好有風範，可以令成隊Crew變到好似軍隊咁，實在令人佩服！」
最緊要有認同
從此事可看出天華是個每事問、不怕煩的人，現在的他也是如是，可能真的有等價交換，天華近年幸運地得到不少好角色，縱使Laughing鎩羽而歸，未能得獎，他已是觀眾心目中的大贏家，他說：「如果冇獎攞，唔通我要揼地咩，其實我已得到人哋認同，唔係我自吹自擂話自己叻，而係我覺得Laughing滲入咗每一個層面，咁先有價值，我有為此飄飄然，飄足兩個月，真係好享受！」
後記：配角媲美視帝
訪問當日，有位PR向天華祝福：「祝Laughing哥可以攞到最佳男主角！」天華聽罷惟有笑晒口答謝，當PR得知天華冇份爭視帝時即說：「我一直都當咗你係最佳男主角！」令天華笑不攏嘴！