樂壇天后容祖兒昨日出席《兒童愛心馬拉松》活動，為近2,000名兒童打氣兼帶領做熱身，她更與英皇慈善基金捐出10萬元到「麥當勞叔叔之家」，興建「祖兒樂園」幫助病童，果然為善不甘後人！

祖兒為小朋友樹立好榜樣，為善不甘後人。

容祖兒帶領小朋友做熱身，十足大細路！

在台上紮紮跳的祖兒，原來最近受感冒及聲沙問題困擾，前晚更失眠，她大呻：「好煩呀！」祖兒指可能因為天氣乾燥，加上身體較虛弱以致聲沙：「我去咗針耳穴，直接上腦效果快好多，我仲貼啲珠喺耳仔，不過痛過針灸好多！（擔心再失聲？）如果以前有10分驚，依家就係3分，啲朋友都成日叫我唔好咁大聲講嘢！」

打算離家出走

祖兒透露明年1月推出的新碟仍在趕工階段，故暫時不敢請假：「尋日原本放假，我都返咗公司做嘢，依家錄咗3首歌，仲有3首呀！（叫公司畀你放假？）公司有分數o架喇！歌都未錄好，唔係咁好意思放假！不過如果唔可以用把聲，我會離家出走o架！（走幾耐？）幾日啦！」