早排孫耀威（老孫）因為喉嚨有事，入咗醫院做手術，好在休息一排之後慢慢好番，仲變得肥肥白白，有次小小So喺電台見到佢，即刻問候吓老孫！
小小So：老孫，好番晒未呀？
老 孫：冇乜事啦！依家把聲冇問題，隨時都可以唱歌錄音，不過醫生叫我講嘢唔好咁大力，好易傷聲！
小小So：好似肥咗啲喎？
老 孫：係呀！早排休息嗰陣係咁食，肥咗十幾磅呀！呢個禮拜狂打波，五日瘦咗十磅，仲逼自己一日食一餐，依家身材至OK！
小小So：你真係好彩，咁快就好番！
老 孫：唉！呢排屋企好黑仔，屋企人喺呢年輪住入院，我、媽咪、爹哋、妹妹、妹夫同妹妹嘅BB都入過醫院，之前媽咪啱啱做咗白內障手術，可能抵抗力差，之後就「生蛇」！
小小So：伯母冇事嘛？
老 孫：因為媽咪好活躍，成日出街練粵曲、飲茶、游水同朋友行街，依家我逼媽咪搬嚟同我住，軟禁佢喺屋企休息，自從屋企人輪流病之後，發覺健康真係好重要，希望呢單係最後一單啦！