要做到紅而不驕絕非易事，喺娛樂圈打滾多年嘅台灣女星楊謹華，最近憑偶像劇《敗犬女王》火速上位，一下子大堆工作自動送上門，連訪問都排得密麻麻。早排小小So去台灣搵佢傾偈，原本約定9點半喺小小So下榻嘅酒店等，正當小小So以為藝人例必遲到之際，原來謹華早已喺酒店大堂等候，之後仲去小小So間房一齊上網分享短片，毫無半點明星架子！
雖然最後大家傾到凌晨一點，難得謹華冇半句怨言，只見佢期間不停按摩雙腳，原來佢着高踭鞋着得太耐，反而唔認因為陪小小So傾成晚而攰爆。臨走前，謹華不斷同小小So講：「謝謝！辛苦你了！」原來謹華喺活動後為免令小小So久等，結果連晚飯都未食就揸車嚟會合，期間同小小So以小食充飢，認真唔話得。