容祖兒前晚與何韻詩、陳奕迅、古巨基、謝安琪和方大同等出席音樂會，身穿灰色YSL品牌Deep V連身褲的祖兒，被視為無綫「最受歡迎女歌星」大熱，她坦言有大家支持已當得獎，問到是否已準備頒獎禮戰衣，她說：「好開心有朋友幫我搭路，係外國行過Catwalk某品牌嘅2010年春裝，已經畀咗我嘅三圍尺寸同唱片封面相佢哋，睇吓邊套適合我着囉！」

至於穿上低胸背心、腳踏四吋「超幼條」高踭鞋的阿詩，被問到Deep V可會再Deep？她笑說：「仲要低，咪低到落肚臍？」她更指平胸較型，故拒絕用「缽仔糕」令上圍更豐滿：「我唔想太勁，一陣以為我去咗邊度整添！」阿詩透露稍後要到外地演出舞台劇，故未必能夠出席樂壇頒獎禮。

Eason自讚鑽石身形

同場的陳奕迅（Eason）被問到可會請太太徐濠縈幫他準備頒獎禮戰衣，他說：「呢啲不嬲自己搞，佢要睇住時裝店又要湊女，不過佢同Wyman（黃偉文）都係，行開街見到啱我嘅，都會幫我留起，我『鑽石身形』好易搵衫。（身家都係『鑽石型』?）有錢如果唔識同人分享都係好寂寞。」當記者笑他有妻女與他「分享」，Eason即笑說：「唔止，仲有好多人嘅！」另外，一直渴望與黃耀明合作的古巨基，前晚終得償所願與對方合唱《春光乍洩》及《歡樂今宵》。

祖兒與Eason合照時，一個屈膝、一個趷高腳，相當搞笑。

方大同和謝安琪在台上合唱。