名模姚予晴（Mikki）初出道時，多年嚟都以Freelance形式接Job，年前為咗大樹好遮陰，最終決定簽畀熊黛林（Lynn）嘅經理人Kim。外界覺得Mikki唔係Kim嘅親生女，接Job會好蝕底，連我小小So都戥佢擔心！不過去過巴黎行騷嘅Mikki，點都係國際級Model，始終係一線品牌嘅至愛，尤其係啲大牌子搞啲靜態活動，Mikki一定係台柱，品牌鍾意佢夠台型之外，更鍾意佢唔會多嘴！
好似上次Mikki幫Louis Vuitton新舖開幕做Model時，佢知道品牌一向唔建議Model喺呢種情況接受傳媒訪問，就連小小So上前同佢傾偈，佢都堅持「三緘其口」，佢見小小So唔係好明白，就做咗個封嘴手勢，之後有侍應遞啲Finger Food畀佢，佢都微笑謝絕，咁專業又唔博出位嘅態度，唔怪得啲大牌子都點名搵佢啦！