昨日「大紅大紫模特兒公司」舉行開幕活動，宣布希望將旗下藝人帶到本地以至亞太地區的媒體上，包括電視廣告、電視劇、時裝表演、電影及推廣活動等。黎耀祥、李珊珊、黃伊汶及王喜等均有出席，而未有到場的容祖兒、李克勤、郭書瑤及周麗淇則錄短片以示支持。

台慶頒獎禮視帝大熱祥仔心情大靚，獲無綫總經理陳志雲全程傍實，更提點他記緊「醫肚」。問到獲高層傍實是否證明攞硬視帝？祥仔笑說：「好多人企喺佢身邊，我叨光啫！（打動你簽約？）佢都冇同我講過，佢又唔係負責呢部分，咁演員同公司都有自己立場，唔係邊個開口嘅問題。」雖被視為大熱，但祥仔笑言仍要日日拉票：「咁又冇咩壓力，我覺得好似六合彩咁，係好恨，但又覺得未必中，所以當係一個Bonus，中就開心，唔中又冇咩影響。（睇好邊個？）陳豪！佢不嬲都係好演員。」

李珊珊有意回巢拍劇

而與祥仔形影不離的陳志雲，被問到此舉會否擔心惹揣測，他說：「香港有幾大？（係咪睇好祥仔？）佢一向都好好，舊年又攞獎，我又搵咗佢幫我錄頒獎禮歷史。（如果唔係祥仔攞，擔唔擔心畀人掟雞蛋？）我每日都食蛋。（係咪會順應民意？）我呼籲觀眾對支持嘅偶像或演員投票，同埋想講經理人合約唔係攞獎主要因素。」

天氣驟冷，李珊珊收起性感，打扮密實。	未能出席的周麗淇，錄製短片以示支持。	「大紅大紫模特兒公司」開幕，希望將旗下藝人帶到不同媒體。

對於祥仔獲高層傍實，珊珊笑言當年攞港姐冠軍時，亦經常坐在高層身邊，並坦言若無綫邀請拍劇也感興趣。問到感情生活，珊珊表示「冇乜特別」，記者笑問她是否仍周旋於「復合」及「三角戀」之間，她即撒嬌說：「難得靜咗一排就唔好再提喇！有好消息一定會公布！」