羅拔、姬絲汀與Taylor Lautner連日來為《吸血新世紀2新月傳奇》宣傳，前日於德國慕尼黑奧運場館出席HVB青年人活動。戲假情真的羅拔與姬絲汀雖未親口承認拍拖，但出席公開活動時已不再避嫌，更旁若無人地在台上咬耳仔，又挨身挨勢搭膊，關係不言而喻。

此外，新推出的羅拔非官方傳記中揭示，羅拔成為萬人迷後原來終日擔驚受怕過日子，他無奈地說：「有人叫我咬佢哋，或者想摸我嘅頭髮。有女影迷試過爪傷頸部流血吸引我注意，叫我吸佢嘅血。」他不希望影迷自殘，亦擔心人身安全受威脅：「我唔想畀人用針拮後染上愛滋病，亦唔想畀人槍殺或者拮死，好驚自己成為恐怖分子嘅目標畀人炸死！」

羅拔表示成名後表面風光，但有苦自己知：「我有啲擔心，當我返到倫敦，就會發現全年所做嘅只係穿梭各大城市聽人尖叫！我覺得已經再冇話題同朋友分享，呢樣真係會摧毀我！」

被迫穿着女裝

另外，羅拔小時候長得甚女性化，成為兩名姊姊的「玩具」，經常要他穿女裝衫，又替他改女孩名字「歌地亞」。他透露12歲首次與女孩接吻，但至18歲才有正式女友。羅拔笑言如果不拍戲，很想做一名饒舌歌手，卻嫌自己看起來不夠兇，不能勝任。