孖仔組合Soler的細孖Dino昨日在數碼港姬子皇朝舉行結婚註冊，晚上筵開二十二席，迎娶拍拖四年的女友黃麗施（Nancy），bma老闆羅傑承、周麗淇、側田、盧巧音與男友Sammy、梁奕倫、Chita及許懷欣等紛紛到賀，星光熠熠。
意大利度蜜月
昨午約三時進行註冊儀式，Dino穿上緬甸的新郎禮服，新娘子則穿上中國傳統裙褂。大孖Julio大爆Dino宣誓和接新娘感動落淚，又自爆被弟弟的情深說話感動得三度落淚，他表示晚上將為Dino伴奏，問到接新娘的過程時，他說：「過程好核突，又要扮狗嘅動作，仲要我哋除咗對襪用腳夾棉花糖食，同要飲Wasabi溝水，搞到我依家都好似消化唔到咁。」
晚上約七時，主角Dino以白馬王子Look現身，不過太太卻怕醜，故由他獨自接受訪問，曾兩度感動落淚的他說：「我應承咗自己唔好喊，不過最後忍唔住，因為太感動。（今晚有咩表演？）會唱自己作嘅求婚歌，不過唔想以表演形式咁，即興啦！今晚個台會Open畀大家，想唱就唱。（婚後即生小朋友？）都有討論，希望唔超過兩年啦！（婚禮用咗幾多錢？）未計好，不過能力範圍啱啱做到，屋企人同朋友都有幫手，禮服都有贊助。」兩人婚後會到意大利度蜜月。
bma老闆羅傑承親自駕車接載太太梁芷珊到賀，他說：「剛在新界睇完足球賽趕過嚟。（送現金做人情？）係呀，5位數字！（有冇送夫妻相處之道？）Dino得㗎啦！斯文、乖仔又冇脾氣，好多女仔鍾意。（吸引好多飛來蜢？）唔會，佢又乖又專一。」姍姍來遲的周麗淇說：「做完嘢飛車趕嚟，我都係送現金做人情，呢排好多朋友結婚，一個月出席七個婚禮。」她大讚Dino有才華，問她可會找個意大利男友？她哈哈大笑說：「我淨係識意大利Pizza同意大利粉，但唔識講意大利文！」
婚宴菜單
金豬大紅袍
蝦球翠花枝
富貴海鮮盒
玉環瑤柱甫
紅燒竹笙海皇翅
北菇鮮鮑片
清蒸大青斑
蘇杭桂花雞
福建炒飯／乾燒伊麵
南瓜西米露
法式美點