最近「美味天使」豆沙包（梁梓悠，前名梁懿晴）是非纏身，被監製喪插偷懶兼甩舞，但係早前小小So見到佢心情不知幾好，完全冇為呢啲負面新聞唔開心，仲好雀躍咁談笑風生。外表斯斯文文嘅豆沙包，平時唔多出聲，但一出聲就語出驚人，話說小小So同佢講開寵物經，通常女仔都係鍾意啲可愛嘅貓貓狗狗，但佢就與別不同，鍾意玩啲另類動物。
小小So：你有冇養貓狗做寵物？
豆沙包：冇呀！我唔鍾意貓狗，我鍾意啲奇怪嘅動物。
小小So：咁係咩動物呀？
豆沙包：我鍾意貓頭鷹同鷹呀！好想養，但養唔到呀！
小小So：咁驚？你鍾意啲咁兇猛嘅動物㗎？
豆沙包：係呀！喺窗嗰度見到啲鷹飛過，覺得好型，而貓頭鷹就夜晚放佢出去就得喇！平時唔使理佢，但係養佢哋要攞牌。
小小So：攞牌又真係幾難，咁都冇辦法。
豆沙包：如果要養狗，我鍾意啲個樣似狐狸嘅狗，塊面長長哋咁。
小小So：真係估唔到你嘅愛好咁特別！