天氣逐漸轉涼，各女星盡最後努力，以低胸打扮出席各項活動，引發連場「胸」戰，時裝設計師陳刀大讚張曼玉和Angelababy的低胸裝扮，高貴有型。
張曼玉有型有格
「着低胸裙最緊要皮膚滑溜、唔好有斑或者粒粒，要挺起胸膛，唔可以冇信心。Maggie（張曼玉）條低胸裙好靚，無論係手錶或頸鏈，都好配合，襯得好Perfect，畀人高貴中見型格感覺，係型格性感美。」
評分：10分
Angelababy配襯得宜
「Baby身形均勻着得好靚，條裙顯得佢腳長身瘦，有腰有胸，加埋頸鏈同髮型好Match，其實佢可以Carry唔同造型，斯文、高貴甚至狂野都可以。」
評分：9分
鍾楚紅散發高貴
「紅姑條裙嘅顏色同Cutting比較老土，不過就襯到佢嘅膚色，好彩係佢着，否則其他人着就出事，而且佢Keep得好好，低胸性感，散發高貴味道，若然頭髮梳得整齊啲，就更加好睇。」
評分：7分
趙碩之顏色錯配
「點解低胸背心會襯頂雪山飛狐帽？變咗Focus喺頂帽，錯配囉！碩之身形都OK，不過成個打扮好多嘢都唔夾，帽唔襯皮帶，Colour Sense錯晒。」
評分：4分
鍾欣桐顏色Sharp
「阿嬌個樣本身好靚，條裙顏色好Sharp，出到個胸形，不過配飾有啲問題，手鈪同頸鏈Heavy咗，若果揀番條幼鏈，就更加理想。」
評分：7分
楊千嬅健康性感
「千嬅條裙好靚，最近着衫有進步，低胸得嚟健康性感，手鈪襯番條裙嘅Tone，髮型好睇，如果戴番對誇張少少嘅耳環同條裙短啲就更好。」
評分：8分
鄭融過於肥美
「條裙着得鄭融肥咗，條Belt束高咗冇乜飾物配襯好寡，加條幼鏈會好啲，佢適宜着Slim Cut嘅衫褲，依家係性感『肥』美。」
評分：5分
陳刀簡介
土炮時裝設計師陳刀畢業於香港理工大學，03年舉行首個個人時裝展，曾為樂隊野仔、女歌手麥家瑜和李卓庭任形象及服裝指導，早前還「升呢」出書做作家。