日前有報道指鄧麗欣（Stephy）不想與傅穎（Theresa）同台而缺席記者會，不過大會昨日解釋因Stephy今年冇歌入榜，故未獲邀請出席，Theresa聽後鬆口氣說：「真相大白，唔關我事啦！（佢冇歌入榜？）唔知道，我嚟到先從同事口中知道我有歌上過榜！不過因為要拍戲，我唔會出席4台頒獎禮。」
由於上榜歌《花吃了這女孩》屬金牌大風時代的作品，問到是否以行動宣洩不滿？Theresa說：「唔係，因為要拍戲！（怕食白果？）唔會，之前食白果我都有去！」至於與金牌大風的合約糾紛，她表示已交由律師處理，問到會否和解？她說：「未定，唔方便透露。（金牌大風私下有冇搵過你傾？）冇！」
