新片《2012》講述有關瑪雅古代文明年曆的預言，指太陽系九大行星將於2012年連成一線，令南北極磁場轉移，產生連串災難，人類面臨世界末日！在戲中飾演作家的尊古錫帶家人逃離發生大地震兼面臨陸沉的加州，他說：「有一幕講我載住家人飛車走難嘅場面，當中嘅大廈、整條街或者棕櫚樹起喺啲水力計算板上面，我哋喺上面揸車會搖得好犀利，希望觀眾會感受到個大製作。另外一場雪山嘅場景，係我見過嘅最大場景，足夠畀演員發揮。」

為襟撈演父母

被問到假若2012年真的是世界末日，他們會做甚麼？尊古錫說：「我會游吓水，同家人朋友度過，去一啲未去過嘅地方好似南美洲。」羅蘭則表示不相信會發生，但若然應驗便會邀請所有親友到高山舉行滑雪派對，尊古錫聞言即舉腳贊成。Harald則笑言要趁機碌爆信用卡；Chiwetel則指想多拍一部片才去旅行。

尊古錫近年不時飾演父親角色，但現實仍是單身，對此他鬼馬說：「喺荷里活，後生嗰時你要拍戰爭片，但好似我咁要喺呢行撈成廿年，你就要演父母。」早前與周潤發及鞏俐拍《諜海風雲》的他表示，與兩人合作是個很好的經驗：「我好佩服佢哋可以中、美兩邊走，又可以講兩種語言。」他還踢爆發哥與鞏俐雖有教講普通話，但他自言資質差，只能即場簡單地說：「你好，謝謝！」

開拍電視續集

導演羅蘭向來愛在電影中揶揄政府，今次亦不例外，更找金髮美女拿着芝娃娃扮Paris Hilton，又加入一些有趣角色如俄羅斯富豪的肥孖仔，羅蘭說：「只係諗到要起方舟的話，一定係富豪出錢。而且我鍾意呢類騎呢角色，係有趣嘅配搭。」羅蘭近日更表示有意開拍續集電視劇《2013》，講述電影中災難後的景況。

對於波蘭斯基可能被引渡返美一事，羅蘭指事隔多年，對他被捕感奇怪，並同情他當年因太太被殺而染上毒癮，認為受害女子生活安好，似暗指某些地方檢察官有博出位之嫌。